[轉貼]美容業投訴勁升 詩x剝光豬逼簽約

小sion子

(我是二次轉貼的~但內容出處我猜應該是一周刊~)

金融海嘯下，小型美容院相繼執笠，倖存者則施以騎呢怪招拉客保命。本刊今季收到四十三宗美容院投訴，較上季增加三成。
眾多美容投訴中，最誇張要數近期甚出位的詩x美容集團。有讀者到詩x試做療程，職員嚇唬她乳腺阻塞，更趁事主一絲不掛時，逼她簽下約九萬元療程。事主面臨沉重財政壓力，一度想過輕生。

陳小姐從未做過任何美容療程，五月她收到詩x的「時比高」計劃推銷電話，「職員話一百六十八元就可以試做 facial（面部療程），我明年結婚，諗住影婚紗相時靚啲。」
職員約她到元朗分店，「佢哋話我皮膚嚴重缺水，唔適合做『富比高』，要轉做八百八十元較好的療程。」她見收費不高，遂一口應承，惟做畢後仍被職員拉着，游說買下一萬八千多元的美容套票。

連消帶打瘋狂推銷
陳小姐不虞有詐付款，但她萬料不到兩週後再到分店接受療程時，職員即變本加厲，「我做做吓 facial，佢哋話我胸部乳腺閉塞，要測試吓。」職員着她脫光衣服，在她的乳房塗上啫喱，「搽咗一兩分鐘後，美容師好大聲話我個胸吸收唔到啫喱，乳腺閉塞得好緊要，長此下去胸部會萎縮，影響到子宮和日後生 BB。」
職員順勢推銷，叫她加碼做每次一千六百元的手部按摩通淋巴乳腺療程，陳小姐心亂如麻便答應。美容師剛按摩完她的右胸，又要她多買三十次套票，「美容師話不同信用卡有不同優惠，問我有咩信用卡都俾晒佢睇。」陳小姐如中魔咒，乖乖遞上四張信用卡予職員。


一絲不掛逼簽單
陳小姐驚魂未定，還未穿上衣服，又被三名職員衝進房間圍攻，「當時我真係好驚，身上只有條毛巾蓋住背脊，佢哋已碌晒我啲卡，逼我簽單。」陳小姐以為只多簽約四萬元療程便可脫身，豈料職員不斷遞上新單據，眨眼間便買了約九萬元療程。
「我喊住要求取消療程，話筆錢等住結婚，但佢哋發惡夾硬塞支筆要我簽。若果我當時頭腦冷靜，打俾朋友即刻報警，都唔會發生呢件事。」結果陳小姐被困三小時才可離開，職員還逼她用錄音機說出自己的身份證號碼，並由職員多口補句「不能退款」。
「我未婚夫平時好慳，但我就咁嘥晒啲錢，離開美容院後我諗過自殺，我都唔敢話俾佢知。後來佢見我幾日都食唔落飯，問我發生咩事，我先敢講。詩x真係好無良。」陳小姐語畢即眼泛淚光，全身發抖。


放蛇　困五小時逼簽卡
上週，記者到元朗分店試做一百六十八元的「富比高」面部療程，職員帶記者到一間獨立暗房，着記者換上浴袍後，美容師即牙尖嘴利說：「睇吓你成面都係紅粒，仲開始敏感添。」美容師不停數落記者皮膚差，要試做深層清潔及美白療程。
記者躺在床上，滿面仍是未乾的面霜，美容師趁機問記者拿信用卡，「我哋而家有信用卡優惠，滙豐、恒生、大新、中銀咩都有，你有咩卡啊？」記者表示不肯定隨身帶哪張信用卡，美容師即時表現緊張，「咁你有咩卡先，永亨我哋都有優惠，你有無帶啊？」
當時記者的手袋擺在床頭一角，身體及頭髮皆被毛巾包着，根本動彈不得，於是含糊以對，美容師仍不理記者處境，咄咄逼人道：「咁你不如起身睇吓啦？」

淋巴腫脹史無前例
見記者不肯就範，另一美容顧問即走進房間，閒話家常時得悉記者常要打字，故作關心說：「你成日打字，肩膊一定好痛。你睇吓，背脊腫晒，淋巴實塞晒，我都未見過啲客好似你咁腫。」
接着她游說記者試做全身通淋巴療程，美容師一邊推按記者背部，一邊嚇唬道：「你背脊好多毒素，我而家幫你推順淋巴系統，但一定要 keep住做。毒素日久積累會有淋巴癌，你識唔識林振強？佢就係淋巴癌死的。」記者企硬不肯幫襯，足足被困五小時，才可脫身。

專家話　亂吹淋巴閉塞
皮膚科醫生史泰祖直言，「乳腺閉塞會導致胸部萎縮」一說全無醫學根據，並斥責「淋巴閉塞」實屬亂吹，「普通人好少淋巴閉塞，只有身體組織嚴重發炎，或曾受過電療而傷咗組織的病人，才有機會淋巴閉塞。而且淋巴閉塞，亦不會引發淋巴癌。」
同時，淋巴系統也不能帶走身體毒素，「淋巴系統係一個循環系統，毒素係唔會經此排出體外，身體毒素係由肝和腎排解。」

回應　拒絕回應
本刊將陳小姐投訴轉介至詩x美容集團，該公司謂已把案件轉交律師處理，故不作回應。（投訴組）
壹判官詩x趁客人赤裸，擅自碌卡過數，然後威逼客人簽名，手段真是惡毒之極！
評分：劣劣劣劣劣
（五個劣為最嚴重）

miracle_land

WA~咁都有~~
而家d美容院真係不要得~好可怕

wai..

要靚真係可以搞到咁..

雪之精靈

我都有睇到尼單野...
我多數去鋪頭仔做,而且係一次性咁做....
我唔會買套票囉...咁唔穩陣

缺心情

真是離譜~
詩琳美容集團，正是美容界的害X之馬。

其實那個陳小姐大可以不除衫，真的沒點知識。

元朗店的地址在哪?

[ 本帖最後由 缺心情 於 2009-7-7 04:31 PM 編輯 ]

小sion子

原帖由 雪之精靈 於 2009-7-6 08:14 PM 發表
我都有睇到尼單野...
我多數去鋪頭仔做,而且係一次性咁做....
我唔會買套票囉...咁唔穩陣

如果想興之所至先去做, 唔想俾限期綁住, 又唔介意每次俾貴少少既~咁join單次當然無拖無欠d啦~
但我自己就做落都會買套票既, 畢竟真係平好多, 我又會定期去做~
不過我就對大美容院呢d銷售手法好反感.....所以凡親有分店個d多數我都無咩好感~(除左我而家join個間~嘻~)
我覺得你等我做完facial出黎入房仔sell無問題, 但做緊facial既時候sell就感覺好差, 更遑論困住唔俾走......
而且隨住自己已經搵到三四間安心既美容院, 而家已經無以前咁躍躍欲試lu~所以試做而家對我殺傷力不大~

不過相對地, 細鋪最叫人擔心既唔係配套設施無咁好, 而係你更加唔會知佢幾時做唔住~oo~"
相對地集團式經營就無咁容易執笠@x@"

原帖由 缺心情 於 2009-7-7 04:26 PM 發表
真是離譜~
詩琳美容集團，正是美容界的害X之馬。

其實那個陳小姐大可以不除衫，真的沒點知識。

元朗店的地址在哪?

其實好多大型美容集團都有大同小異既推銷手法......
佢除衫呢個就正常步驟黎既......就算我係做facial都有按肩頸, 都會換衫既~加上佢係做body~更加無可能唔除衫啦~
真正問題係d美容師幫佢做做下body走入房sell佢.......
但佢可以企硬係事實, 佢唔咁避讓可能事情就完全唔同~
不過香港好多平時少做facial, 少去開美容院既純真少女/婦人都好容易俾人哄/嚇到join course, 所以先要揭露呢d得人驚既銷售手法, 等大家有心理準備/有所防範呢......
我自己如果真係要去呢d出名hard sell既地方, 一定唔帶card~oo~